2026年F1賽季一開始所見，動力單元（PU）同能量管理嘅重要性明顯超越舊制以氣動力同懸掛系統為主嘅影響。Mercedes廠隊靠佢哋深耕細作嘅PU技術，成功將內燃機（ICE）同能量回收系統（ERS）嘅協同效應發揮到極致，奠定咗明顯嘅競爭優勢。當能量輸出控制得宜，接落嚟對保持輪胎性能、工作溫度等各方面都會帶嚟正面影響，全套系統一開波已經運作流暢嘅話就已經同另外十支車隊處於唔同嘅層次。喺啱啱完成嘅中國站，Kimi Antonelli繼打破最年輕排頭位紀錄後完成pole to win獲得職業生涯首勝，同Russell連續兩場為Mercedes包辦晒頭兩名。

Ferrari "Macarena"反轉尾翼：一直只聞樓梯響嘅虛擬武器？
大家只要稍為留意Mercedes嘅開季表現，就會明白佢哋嘅已見優勢係有幾大。Antonelli喺揭幕戰澳洲站練習賽撞到架車不似車形，但好在車隊迅速維修，就算甩頭甩髻都可以排位賽鎖頭排、正賽跟得上Russell炮製隊史上首次冇Hamilton參與嘅1-2 finish。一開始已成為奪冠大熱嘅Russell喺澳洲站正賽、中國站衝刺賽開段同Ferrari嘅纏鬥都變咗更為似多餘嘅劇情，就算中國站正賽早段安全車打亂過節奏，只要圈數有番咁上下一拉長打，對手（aka法拉利）都係冇得鬥。Russell喺中國站排位賽Q3甚至係一度轉波失靈、得番一次做成績嘅機會，都一舉後上第二位再一次與Antonelli lock頭排，反映MercedesPU即使遭遇到一啲突發嘅外在障礙，潛力仍遠遠勝出競爭對手。「屈機」情況已拍得住自己隊喺混能年代嗰批「火星車」、比剛過去地面效應年代嘅Red Bull RB19更過之而無不及。

相比之下，Ferrari雖然有小型Turbo為起步提供短暫爆發力，但始終整體動力回應相對不足，就似要一個跑100米爆發力極強嘅短跑選手參加400米賽事。而後方270度旋轉尾翼設計就連Hamilton都自爆係未夠成熟，呢種隊內正式叫法為「flip-flop wing」嘅尾翼喺中國站P1再度現身亦只能淪為「虛擬武器」俾fans自high一場，畢竟喺新制之下能量管理先至係王道，其餘氣動力細部件就算幾有諗頭幾有效率，當PU效能差距太大嘅話都會變成花拳繡腿。更莫過話Red Bull與及McLaren，單計正常表現兩隊仍可以穩守Top 4席位，但佢哋喺電源穩定性／氣動力效能方面仍有好大改善空間（中國站正賽更出現McLaren double DNS、Red Bull Verstappen亦喺尾段退出嘅極尷尬畫面）。

Mercedes：未出盡全力係忌憚ADUO？
而更恐佈嘅係，Mercedes似乎仍未出盡全力。當嚟到上海呢種講求極速同直線加速嘅賽道，Mercedes喺排位賽期間錄得嘅最高時速反而落後Alpine超過10 km/h，同期亦開始傳出Mercedes PU排位賽期間動力輸出設定仍只係行緊5級之中嘅3.5級，一般認為咁樣係有助避免觸發Ferrari利用到賽制中嘅ADUO（Additional Development Update Opportunity，額外發展升級機會）機制加鞭追趕。ADUO係FIA針對技術落後車隊而設嘅升級制度，根據「ICE性能指數」（ICE Performance Index）去授權額外升級機會，當車隊落後龍頭介乎2%至4%可獲1次升級，超過4%則獲雙倍升級權利。呢個制度原意係兼顧公平競爭精神同時容許落後車隊透過自身努力補回差距，避免好似舊制Alpine PU咁無法翻身。呢一刻已傳出不斷死車嘅新仔Audi已經準備好入紙，等FIA根據ADUO批準嚟一次「PU急救」。Mercedes假如好似傳聞咁講留有一手、開季唔拋離Ferrari咁多，Ferrari都確係頭痕。

新變數：2026賽車設計自帶bug、四月賽程突變
FIA已講明6月1日起將為Turbo壓縮比檢測額外加入一項高溫工作狀態下嘅檢測環節，此舉被指為係為咗堵塞傳聞中Mercedes PU Turbo壓縮比喺高溫之下可以谷到上18:1嘅漏洞。先唔好理Mercedes一再重申PU符合現有規定，如果大家都仍然覺得Mercedes係出術、新增測試可以令佢哋優勢瞬即歸零，倒不如認真諗諗Mercedes係喺研發階段部署得有幾成功、其他隊伍相比之下喺決策、執行方面又有幾多不足之處（情況就似舊制一開始嗰陣，就只有Red Bull嘅Adrian Newey團隊意識到全面套用地面效應會產生「海豚跳」現像）。Mercedes賽車整套系統發展異常成熟，暫時估計各種主流型態嘅賽道都唔會對佢哋帶嚟異常大嘅挑戰，唔通過人為手段重新釋例、微調規則恐怕難以改變到現時一面倒嘅狀況。

咁，Mercedes係唔係會惡足全年？暫時所見已出現咗兩大變數：四月份中東兩場巴林站及沙特站十分遺憾終於宣佈取消，最粗暴嘅解讀就係Mercedes將會平白失去兩次屈機機會。當日本站（亞洲）、邁阿密站（北美洲）之間突然形成一個長達五星期嘅超長停戰期，時間、物流上嘅新變化都好有機會促使各隊交出重磅更新（咁當然都不能避免Mercedes自己同期都會有新花臣推出中和對手）。

此外，2026年嘅PU規則同能量管理方案，尤其係電池管理部分，已引起多位車手嘅反彈。佢哋公開、私下都表示新系統過於限制車手操作，令駕駛感覺唔自然，限制咗激烈競爭，令賽事觀賞性受影響之餘，更重要而最能觸動改例嘅切入點在於：當唔同能量狀態嘅賽車喺起步、加速階段產生速度差距去到每小時30至50公里，高風險追尾以至嚴重撞車嘅概率已係提升到去一個不能忽視嘅水平，Verstappen受訪時用「玩瑪里奧賽車」嚟形容當下局面已係十分俾面賽會。據報FIA同賽會已明白到問題所在，並計劃喺中國站完後一併檢討現有能源回收（harvest）與動力部署（deployment）嘅規定，目標係喺接落嚟嘅日本站試行改良方案。到時提升超充電（super clipping）效率或者降低峰值輸出等手段齊發會唔會順便收窄咗Mercedes同各隊之間嘅表現差距（兼又可以驗證Mercedes PU半力出擊嘅傳聞有幾真），各位又可以拭目以待。