足總盃決賽將於溫布萊上演，車路士與曼城再度正面交鋒。曼城今季已先奪聯賽盃，足總盃亦延續其「盃賽專家」嘅穩定性，連續四年殺入決賽，並有望繼2018/19球季後再度成為英格蘭史上第六支完成「雙盃」嘅球隊。車路士聯賽攻力疲弱，但盃賽面對較弱對手時就火力全開，晉級過程相對順暢。兩隊風格鮮明：車路士以速度與反擊見稱，曼城則憑控球、結構與成熟度掌控比賽。兩隊最近一次交手係四月聯賽，曼城作客3:0大勝，心理上佔優勢。自2020/21歐聯決賽敗於車路士後，曼城其後所有賽事對藍戰士都保持不敗，亦為今場增添信心。

 

車路士今季喺足總盃嘅表現極具說服力，從第三圈開始一路大勝，包括5:1贏查爾頓，4:0贏侯城，7:0維爾港，準決賽再以1:0淘汰列斯聯。展現出高壓逼搶與快速轉守為攻嘅效率，而且火力點分散，中前場可以入波嘅人唔少：柏度尼圖(Pedro Neto)，安素費南迪斯(Enzo Fernández)，祖奧柏度(João Pedro)等有質素球員，都係車路士決賽嘅最大本錢。車路士亦算係足總盃決賽常客，第17次晉身決賽，僅次於曼聯同阿仙奴，只係成績就唔理想(8勝8負)，近三次決賽全敗，近八場喺溫布萊只係入左4球，而且連續四場決賽零入球。

 

相反，曼城雖然決賽次數不及車路士，但絕對稱得上盃賽專家，過去23場足總盃贏21場，僅失落2024，2025兩場決賽。今屆晉級過程同樣展現壓倒性統戰力：10:1大破埃克塞特，2:0沙福特城，之後用高強度壓倒紐卡素同利物浦，分別贏3:1，4:0，攻防控制力極高。四強對修咸頓先失一球下穩住節奏，最終反勝2:1。關鍵在於比賽處理成熟：掌控節奏，高效攻守轉換，穩打穩扎咁贏。近期狀態最火熱嘅度古(Jérémy Doku)，近兩季足總盃累積3入球5助攻，係參與入球最多嘅球員。至於夏蘭特(Erling Haaland)雖然仍未喺任何決賽為曼城取得入球，亦未曾喺溫布萊開齋，但曼城三叉近況漸入佳境，而其中兩人周中對水晶宮亦有輪休，準備十足迎戰決賽。

 

車路士與曼城今屆足總盃決賽屬典型強強對碰，曼城喺溫布萊擊敗阿仙奴捧走聯賽盃，加上四連入決賽嘅氣勢與近年盃賽高勝率明顯佔優。車路士憑速度、逼搶與盃賽火力殺入決賽，雖然近年決賽運勢一般，但仍具爆冷能力。曼城希望掌控節奏，車路士則以反擊尋找突破，最終勝負將落喺細節同臨場執行上。