05/09/2026 02:30 史特加(德甲18) vs 科隆(德甲7)

史特加揭幕戰作客拜仁慘輸 1:5。從世界盃歸來嘅 Undav、Stiller等主力節奏未跟得上，中場控制力同防守組織都未番到正常水平。科隆則喺皇牌新秀El Mala續約沖喜之下以3:2反勝賀芬咸，借將前鋒Dallinga後備入替亦即刻入波，初步印證今季引援策略成功。

05/09/2026 21:30 賀芬咸(德甲12) vs 多蒙特(德甲5)

賀芬咸首仗作客科隆輸2：3 落敗，臨完場俾對手連入兩球，末段專注力稍為不足。多蒙特主場2:0贏漢堡代價係新援Konstantelias十字韌帶撕裂長唞，球會唯有急向阿仙奴再借Nwaneri，此外前鋒Inacio直紅更要停賽兩場。多蒙特星期二多踢咗一場德國盃，大幅輪換之下大勝HEBC漢堡5:0。

05/09/2026 21:30 柏林聯(德甲8) vs 利華古遜(德甲13)

柏林聯首仗主場 3:3 和法蘭克福。新教練 Lustrinelli 回歸四後衛踢法，但教練Lustrinelli都承認球隊已長期習慣踢三後衛，適應過程仍需時間。2024年冠軍班底已接近完全瓦解嘅利華古遜作客2:3不敵升班馬艾華斯堡，防守速率、默契都令人驚嚇，球會已經知衰即趕喺夏季轉會窗關閉前簽入剛代表科特迪瓦踢世界盃嘅右閘Guela Doué，此外亦買番舊將右翼Moussa Diaby，希望起到止血作用。

05/09/2026 21:30 慕遜加柏(德甲16) vs 艾華斯堡(德甲6)

升班馬艾華斯堡將喺德乙玩開嘅快速反擊同高強度逼搶帶埋嚟德甲，首戰即喺主場3:2爆冷贏利華古遜，已引起各方注意。另一方面組班越來越慳皮嘅慕遜加柏開季首戰作客RB萊比錫即以0:3完敗，前隊長Reitz與及另一中場Engelhardt暑假離隊後只能重新起用副選，實力同近況都有啲令人擔心。

05/09/2026 21:30 雲達不來梅(德甲15) vs RB萊比錫(德甲4)

班底以至教練都換晒嘅RB萊比錫首戰主場3:0大勝慕遜加柏，可以暫時鬆一口氣。RB保持清白之身之餘，亦踢得出新帥Demichelis主打嘅高強度逼搶。雲達不來梅德甲對戰萊比錫已係連續12場不勝，首週作客弗賴堡亦係輸到1:4，中場Stage自從踢咗一場德國盃就已經受傷，估計2026年已經唔洗預佢。

05/09/2026 21:30 柏達邦(德甲11) vs 弗賴堡(德甲2)

柏達邦回歸德甲，首戰作客0:0逼和緬恩斯，全場防守算係硬淨但進攻端缺乏威脅，僅靠定位球同邊路傳中製造零星機會，開季拎到1分算係咁。弗賴堡首週遇上雲達有個好開始，因傷錯過世界盃嘅攻中鈴木唯人即演帽子戲法全場大勝4:1，今場柏達邦番到主場如果延續到硬淨防守弗賴堡嘅攻勢或會有所收斂。

06/09/2026 00:30 史浩克04 (德甲17) vs 拜仁慕尼黑(德甲1)

史浩克04回歸德甲首戰作客0:3不敵奧格斯堡，前緬恩斯門將Karius撲救十次亦難掩球隊實力不足嘅事實。會方及後已從降落英冠嘅狼隊借用前鋒黃喜燦充實戰力。拜仁慕尼黑首場5:1大勝史特加，新加盟嘅左閘Brown串演攻中表現不過不失，但今場焦點一定會落咗去40歲門將紐亞身上，事關今場大有機會係佢最後一次作客母會踢正賽。

06/09/2026 21:30 漢堡(德甲14) vs 緬恩斯(德甲10)

漢堡首戰作客0:2不敵多蒙特，上陣見得人嘅陣容經過大變過後難免俾人一種降咗呢嘅感覺。漢堡留唔住身價搭咗火箭嘅借將中堅Vuskovic係硬傷，另一位表現亮麗嘅攻中F. Vieira本來亦係一早番咗阿仙奴，今次漢堡知驚係咁游說，終於正式簽入回歸希望可以即時補強。

06/09/2026 23:30 法蘭克福(德甲9) vs 奧格斯堡(德甲3)

法蘭克福有Hütter回巢執教，首戰作客3:3僅和柏林聯，領先3:1最終都俾對手逼和，今季後防大執位嘅法蘭克福及後從雷恩簽入中堅Brassier。奧格斯堡失去主力中堅K. Schlotterbeck（轉會修咸頓），首場受惠於對手史浩克戰力未夠淨勝三球防線未受太大考驗，前線方面則從拜仁借用到A.Ibrahimovic。