19/09/2026 02:30 拜仁慕尼黑(德甲1) vs 柏林聯(德甲16)

拜仁上週中歐聯過後作客艾華斯堡一度被追平，要派番正選落場㩒掣先可以穩住勝局，主力框架仍具統治力。柏林聯鋒力不足加上中堅組合未定之下，三戰僅得一分更失夠十球，今場完後更係國際賽假期，新教練Lustrinelli嘅下課危機已係擺在眼前。

19/09/2026 21:30 法蘭克福(德甲9) vs 弗賴堡(德甲1)

堂安律決定唔走，教練Hütter趁勢轉打3-4-2-1俾堂安律重新融合成功加強中場覆蓋，上週作客3:1贏緬恩斯取得賽季首勝。今場迎戰暫居榜首嘅弗賴堡會係更大挑戰。弗賴堡創下球會首次德甲開季三連勝，除咗多得對手「助攻」，本身班底有咗默契攻守兩端都踢得出一定效率，三戰入十球失兩球，今場作客就要睇反擊效率能否維持。

19/09/2026 21:30 慕遜加柏(德甲17) vs 緬恩斯(德甲8)

緬恩斯再前一場大勝漢堡蓋過咗後衛Kohr傷缺嘅問題，上週面對變陣振作嘅法蘭克福即刻現形，但嚟緊對手慕遜加柏形勢更為嚴峻，佢哋開季三戰全敗失12球，上週0:5 慘敗俾弗賴堡後主帥Polanski已經落鑊，助教Lichte暫代都唔會即刻解決到陣容削弱同時新援又幾乎全部傷晒嘅事實，而今場更有中鋒Kleindienst停賽。

19/09/2026 21:30 漢堡(德甲18) vs 科隆(德甲12)

xG僅好過柏達邦嘅漢堡開季失球數字拍得住慕遜加柏，更因為一球未進而喺積分榜墊底，左路及中堅組合持續不穩，中場F. Vieira強勢回歸但仍未完全融入番稍感洩氣，教練Polzin獲信任已提前續約，但眼前挑戰仍急需解決。盛傳會俾Klopp選入德國隊嘅科隆S. El Mala上週只能後備入替，最終同雲達打成平手，嚟緊El Mala如果出場時間同表現再穩定番啲，佢同熱刺借將Moore一左一右將有望砌出更有威脅嘅進攻組合。

19/09/2026 21:30 雲達不來梅(德甲10) vs 奧格斯堡(德甲3)

雲達不來梅上週賽和科隆嘅收獲在於回巢嘅中鋒Füllkrug已係連續兩場入波，進攻架構開始穩定落嚟，後防更有養傷多時嘅右閘Weiser復出。奧格斯堡爆冷暫居第三位固然得益於法蘭克福、利華古遜都未企穩陣腳，而德甲近四次雲達都保持不敗亦提供咗一定嘅心理優勢。

20/09/2026 00:30 史特加(德甲14) vs 多蒙特(德甲2)

史特加上季對住多蒙特主客都未能取勝，今期亦遇上多蒙特開季強勢：前面Guirassy, Fábio Silva嘅進攻組合開始成形，後方亦有Schlotterbeck、Bensebaini復出。史特加上週就連面要對分心歐霸嘅賀芬咸都要輸，期間中場Stiller受傷離場好在應冇大礙。

20/09/2026 21:30 利華古遜(德甲7) vs RB萊比錫(德甲5)

利華古遜上一三輪作客奧格斯堡空有六成控球比率，最終仍只能賽和2:2，問題始於在於未能轉化出高質嘅攻門。論實力，今仗對手RB比星期三歐霸盃對手施捷高幾班，當利華未成熟嘅全線壓上打法與RB未成熟嘅高位壓迫打法相碰撞，主場往績亦唔一定令勝利天秤傾向利華一方（利華古遜德甲主場對賽往績為3勝3和4負，RB中場Ouédraogo肩傷需要開刀）。

20/09/2026 23:30 史浩克04(德甲11) vs 艾華斯堡(德甲6)

史浩克04又係趁柏林聯腳軟全取三分，整體表現實際上仍未算係穩定，今場要靠主場氣勢及前場逼搶爭取主動。艾華斯堡上仗對拜仁雖敗不辱，球隊喺高強度壓迫下仍能保持到組織，反映防守紀律同反擊套路正逐步鞏固，右閘Keidel更盛傳會俾Klopp召入德國隊試腳。

21/09/2026 01:30 柏達邦(德甲15) vs 賀芬咸(德甲13)

柏達邦底子較弱，單講進攻威脅更係有限，但上輪作客強敵多蒙特所見球隊結構尚算清晰，而非整體框架失效，今場客隊賀芬咸喺賽前三日仍喺希臘踢緊歐霸，曾喺賀芬咸二隊做過助教嘅柏達邦教頭Kettemann大概會以取分作為基本目標。