新一季德甲尚未正式開鑼，上季嘅冠亞軍拜仁慕尼黑同多蒙特就先喺今個禮拜六嘅碧根鮑華超級盃先行碰頭。上季拜仁贏到開巷，拉開多蒙特足足16分衝線，但喺呢場友賽性質比較強嘅超級盃之前，拜仁上下正要處理攻中梅斯亞拉（Jamal Musiala）患上怪病帶嚟嘅陰影，而多蒙特喺呢個暑假進行咗大換血，雙方喺超級盃或會被迫踢得較為保守，但往後嘅發展都值得大家追睇落去。
（23/08/2026 02:30 多蒙特 vs 拜仁慕尼黑）

梅斯亞拉先後喺對RB萊比錫以及海登咸嘅熱身賽中暈低，官方之後嘅解釋係佢出現咗神經功能失調，拜仁講到話梅斯亞拉呢個case係可以妥善處理，但外界對於佢能否keep得番喺高強度比賽水平就仍然抱有疑問。對拜仁而言，問題不只係梅斯亞拉能否上陣，更在於球隊要限制使用這名進攻核心時，是否仍然保有足夠創造力。除此之外，其餘嘅進攻尖刀好似哈利卡尼（Harry Kane）、奧利斯（Michael Olise），以至中堅烏柏美卡奴（Dayot Upamecano）都喺世界盃激戰至四強階段較遲歸隊，雖然拉馬（Konrad Laimer）友賽傷出後話自己冇大礙，但同時亦傳出拜仁其實係想放走中堅金玟哉，一連串嘅不明朗因素預期會令拜仁短期內嘅陣容出現較大波動。

拜仁喺德甲揭幕戰嘅對手係上季殿軍史特加，佢哋都需要面對德國國腳歸隊進度不似預期嘅問題。雖然德國喺世界盃一早出局，前鋒安達夫（Deniz Undav）與及中場安祖路史迪拿（Angelo Stiller）都已依時歸隊，但就係爭咁個病咗嘅翼鋒利維寧（Jamie Leweling），加上後防傷兵都唔少，外借完畢諗住用嚟接替紐布爾嘅門將更係未開咧就重傷長唞，拜仁首仗遇上呢隊近況更差嘅史特加，估計未會遇到太大威脅。
（29/08/2026 02:30 拜仁慕尼黑 vs 史特加）

多蒙特嘅未知數則主要來自中前場嘅一連串變動。自從放走白蘭特、艾迪耶美，再俾19歲仔已首次代表意大利大國腳嘅恩拿斯奧（Samuele Inacio）坐上I隊，繼而先後購入卡利查斯（Konstantinos Karetsas）、華亞文（Joey Veerman）等多位中場球員，成隊波嘅中場傳球、控球以及位置分工都要重新磨合，再加上後防兩大主力安利簡同埋舒洛達碧克仍未可以復出，超級盃打拜仁就算有主場之利怕且都只係試陣為先，而聯賽首週繼續主場迎戰同樣係陣容大變嘅漢堡，則應該仍有一定把握。
（30/08/2026 00:30 多蒙特 vs 漢堡）

至於較早前友賽俾拜仁輕取3:1嘅RB萊比錫，話就話係上季季軍，但開季嘅動蕩幅度有可能比多蒙特更加大。話說紅牛集團上季嫌奧利雲拿贏得唔夠清脆利落，用咗一季唔滿意就叫人執包袱走，再引入時任足球總監高普睇好嘅前拜仁球員迪米捷利斯執教，但後者都未開咧高普就已經自己走人，而迪米捷利斯較多玩高位控球嘅風格本來就係同高位壓迫嘅「紅牛風」有差別，加上上季彈起嘅迪奧文迪已經天價轉投皇家馬德里，主力攻中鮑加特拿重傷又有排未見人，今季以慕遜加柏隊長身份轉會嘅韋斯（Rocco Reitz）首場聯賽好大機會就要以主力身份倒戈，佢同負責左路嘅隊長大衛拉林（David Raum）嚟緊能否擦出火花，將會係萊比錫會否出閘脫腳嘅一個關鍵。
（29/08/2026 21:30 RB萊比錫 vs 慕遜加柏）

講到上季前三名咁多不穩定因素，咁其他隊伍又有冇得趁亂搏吓上位？我哋暫時睇落就覺得有啲難。除咗上季季軍史特加有一連串傷患問題，數落去嘅賀芬咸、利華古遜都需要面對陣容大改嘅適應期，上屆歐霸亞軍弗賴堡就更加係失去咗關鍵人物文森比，傳統列強喺開季初段都需要留意會唔會較易出現異常賽果。