30/04/2025 阿仙奴 vs 巴黎聖日耳門

足球資訊 | 歐洲聯賽冠軍盃(2024/25) | 發布日期: 29/04/2025

排名: 英超(2) vs 法甲(1)

歐聯四強阿仙奴主場大戰巴黎聖日耳門，兩隊已經係今季第二次交手，上年十月份歐聯聯賽階段，阿仙奴主場贏巴黎聖日耳門(PSG)。今季慢熱嘅PSG下半季突然發力，先後擊敗曼城，利物浦同阿士東維拉，喺歐聯四強再遇阿仙奴，要報一箭之仇爭決賽一席，期望贏取歐洲球壇最大榮譽。阿仙奴目前各項賽事12場不敗勢頭唔錯，今季歐聯6場主場賽事贏5場。阿迪達明白歐戰主場嘅重要性，希望球迷到時熱烈打氣，為球會創造歷史。

阿迪達同安歷基喺巴塞球員時代係戰友，阿迪達直言好欣賞安歷基嘅執教文化同戰術，喺佢身上學咗唔少嘢。季初兩個領隊對決，阿仙奴當時狀態大勇嘅蕯卡(Bukayo Saka)1入球1助攻協助阿仙奴贏2:0。今次再碰頭，首回合有進帳嘅夏維斯(Kai Havertz)已提早收咧，但阿仙奴八強已經話俾大家知，冇射手冇死球專家加比爾(Gabriel Magalhães)仍然有板斧贏波。迪勤懐斯(Declan Rice)兩個絕妙自由球，再加上客席中鋒美連奴(Mikel Merino)嘅入波3:0擊敗皇馬，作客班拿貝控制戰局下再贏2:1。返到聯賽球員落到場，大概個心已經期待緊歐聯大戰，只能2:2賽和水晶宮。

巴黎聖日耳門八強主場3:1大勝阿士東維拉，作客初段比維拉撳住攻，但兩個反擊得手領先2:0晉級形勢大好。維拉爭勝心不減，狂追3球總比數仍輸5:4，尾段更逼到PSG後防風聲鶴唳。聯賽提早奪冠，可以養精蓄銳全力出擊歐聯，大戰前幾日卻迎來今季第一場敗仗，主場1:3不敵尼斯，終止今季不敗紀錄，對手只得3次中目標射門，全部變成入球。進攻上丹比利(Ousmane Dembélé)近6場都冇波入，球隊進攻火力有下滑跡象。

阿仙奴主場可能會採取較進取嘅高位壓迫，中場搶得控球權，並快速發動進攻。死球戰術仍然喺殺手鐧，對手PSG今季有38%嘅失波來自死球，呢場阿仙奴絕對可以針對對手弱點製造首回合優勢。

預計兩隊正選陣容：

阿仙奴

Raya - Timber, Saliba, Kiwior, Lewis-Skelly - Ødegaard, Rice, Merino - Saka, Trossard, Martinelli

巴黎聖日耳門

Donnarumma - Hakimi, Marquinhos, Pacho, Nuno Mendes - João Neves, Vitinha, Fabián Ruiz - Doué, Dembélé, Kvaratskhelia

分類:

足球資訊

30/04/2025 阿仙奴 vs 巴黎聖日耳門

分類:

標籤:

關於我們:

快速連結:

聯絡我們: