2026年世界盃歐洲區外圍賽九月賽程進入第二日，K組英格蘭作客挑戰排名低28位嘅塞爾維亞。英格蘭四戰全勝，積分領先，防線更加係保持零失球，塞爾維亞暫時少踢一場兩勝一和緊隨其後，仍有機會爭頭名。塞爾維亞鋒線由阿歷山大米祖域（Aleksandar Mitrović）同拉賀域（Dušan Vlahović）帶領，兩位前鋒喺小組賽三場共入四球，配合穩健防線保持零封，喺首戰英格蘭之前都算得上係一支攻守均衡嘅球隊。

英格蘭自杜曹上任以嚟注重攻守平衡，打法力求簡潔明確，旨在提升球隊整體效率，但呢種主打穩陣嘅風格並唔係個個國內支持者所能接受。喺上場對安道爾「僅勝」2:0嘅比賽中，呢支英格蘭隊踢起嚟唔夠流暢，令外界對杜曹嘅穩陣策略再一次產生質疑。杜曹都承認部分進攻球員嘅表現未如理想，球隊喺比賽節奏同射門效率亦都有提升空間，但亦都有解釋到對安道爾場波係希望球隊專注破解密集防守，言下之意係為咗嚟緊呢場榜首大戰作準備。

值得留意係今期英格蘭入選球員身高普遍偏高，尤其係防守同中場位置。喺對安道爾嘅比賽中，正選陣容就只係係得右閘列斯占士（Reece James）同新入選嘅中場艾利洛安達臣（Elliot Anderson）身高矮過六呎。除此以外杜曹亦召入昆沙（Jarell Quansah）呢類高佬補充後防兵源，希望利用球員嘅高度優勢喺死球同長傳破密集嘅用意十分明確。對安道爾一仗中堅位置採用馬克古希（Marc Guehi）+般恩（Dan Burn），亦係希望為球隊提供穩定防守之餘同時做到更流暢嘅攻守轉換。

塞爾維亞強悍體格同鋒線速度配合主場之利，再加上去年歐國盃分組賽都只係僅負一球，氣勢上唔會輸蝕。咁如果杜曹「防守硬淨+識破密集」呢個算盤打得響，前鋒兼隊長哈利卡尼（Harry Kane）有更多機會攻門（K組頭三場入三球）隨時就會成為勝負關鍵。（歐國盃X圖片）