上回合九月英格蘭作客塞爾維亞之前，英格蘭當地仍然係咁鬧杜曹帶隊打安道爾小勝2:0唔掂，但當時我哋已經有提到杜曹成套陣容同打法都係為咗準備之後嗰場對塞爾維亞嘅客場比賽。果然呢場波成為世界盃外圍賽K組嘅分水嶺，塞爾維亞俾英格蘭大炒5:0之後主場再輸埋俾阿爾巴尼亞，而英格蘭延續全勝勢頭，六場合共踢出18:0嘅總比數，已提前取得2026年世界盃入場券。杜曹接落嚟點樣看待餘下兩場足以影響K組第二名嘅外圍賽，值得大家注意。

首先梗係要講番比寧咸（Jude Bellingham）呢單花生，事源比寧咸因傷缺席咗九月份嘅國際賽，去到十月杜曹又想keep住九月套班底而繼續唔徵召比寧咸，成件事變得撲朔迷離。而喺同期，杜曹多咗用國家隊算係新丁嘅維拉攻中摩根羅渣士（Morgan Rogers）踢，四場內已取得入球、助攻各一，算係有所交代。但如今比寧咸回歸三獅大軍，杜曹即表明會俾比寧咸踢番10號位，之前起勢研究比寧咸會唔會從此遭到棄用嘅討論就變得十分可笑。

去到星期四，不嬲語出驚人嘅杜曹又發表偉論，指現時英格蘭個系統裡面容納唔到比寧咸、中鋒哈利卡尼（Harry Kane）、翼鋒科頓（Phil Foden）三人同時踢正選。翻查往績，喺比寧咸與及中鋒哈利卡尼一齊落場嘅35場比賽之中，二人只係試過合力炮製出一個入球咁大把。至於哈利卡尼與及科頓，則更係自2022年世界盃後未有合力製造過入球。埋單計數以科頓形勢最為不妙、較大機會要退居後備，再加上攻中彭馬今期因傷未有入選，杜曹好大機會需要繼續嘗試為卡尼、比寧咸搵番啱條channel。

至於今場主場對塞爾維亞嘅另一焦點，則會係英格蘭能否將不失球嘅走勢延續落去。仍寄望重返K組次名打附加賽嘅塞爾維亞，過度依賴兩位喺中東搵食、夾埋已係67歲嘅阿歷山大米祖域（Aleksandar Mitrovic）與及泰迪治（Dusan Tadic）攻堅，上回合交手已證明係徒勞無功。不過今次英格蘭有主力中堅馬克古希因傷退隊，近期比較多用嚟搭配古希嘅般恩亦有相同遭遇，今場中堅位置大有機會重現上一場對拉脫維亞嘅史東斯（John Stones）、干沙（Ezri Konsa）組合。