世界盃外圍賽A組嚟到最後一輪，德國同斯洛伐克同得12分，世界排名高出36位嘅德國暫只能以較佳得失球位列榜首。德國首回合作客斯洛伐克就以0:2輸波，足見就算今場主場出擊都唔可以掉以輕心。德國呢場波如果再出現防線大意或進攻啞火導致再輸一場，就會有機會繼2002年世界盃後再一次跌落附加賽。

回顧9月首場分組賽，德國作客斯洛伐克以0:2落敗，德國雖然控球率高達65%，但全場進攻組織混亂，防線多次被斯洛伐克快攻撕破。特別係右路防守，當時主帥拿高士文打算將甘美治（Joshua Kimmich）推番上中場，右閘位置改由首次上陣嘅拿美迪哥連斯（Nnamdi Collins）擔當，後者無啦啦孭重飛、明顯未適應國際賽節奏，多次俾斯洛伐克左翼沙奧亞（Leo Sauer）挑機突破。反觀斯洛伐克多次憑反擊製造險情，最終上半場由轉投馬體會嘅後衛漢高（David Hancko）射入，換邊後輪到史迪歷（David Strelec）一個世界波鎖定勝局。成場波德國進攻乏力，傳球失誤頻頻，完全無法展現應有級數。

斯洛伐克及後只係輸過一場對北愛爾蘭嘅客場賽事，剛剛返回主場改踢三後衛亦以1:0贏波成功復仇。場波由處子登場嘅前鋒波錫克（Tomas Bobcek）上演後備上陣補時絕殺，係就係贏得驚險，但總之結果就係keep到同德國同分。斯洛伐克今屆分組賽防守數據理想，除上述輸俾北愛嗰場之外，其餘四場外圍賽都冇失球，兩個後衛史堅尼亞（Milan Skriniar，隊長）與及基安巴（Norbert Gyomber）與拿玻里防中盧保卡（Stanislav Lobotka）組成嘅防線嚟緊作客德國將會起關鍵作用。

至於主場出擊嘅德國，拿高士文雖然首次帶領德國取得四連勝，但上星期作客以2:0擊敗盧森堡只能稱得上係「僅勝」：呢場波有甘美治與及舒洛達碧克（Nico Schlotterbeck）有傷避戰，防線人腳調動唔細偶有甩漏已係意料中事，但實情咁樣大執係會牽連到中前場組織踢唔出章法，德國直到下半場靠中鋒禾達美迪（Nick Woltemade）梅開二度先至能奠定勝局，呢場波禾達美迪身後嘅利萊辛尼（Leroy Sané）、基拿比（Serge Gnabry）喺國家隊已經踢到冇乜火花，另一攻中穫斯（Florian Wirtz）則似乎仍未逃出轉會利物浦後冇乜表現嘅陰影，嚟緊嘅表現難言有咩保證。所以主場對斯洛伐克嘅關鍵，反而係要睇甘美治與及舒洛達碧克能否趕及復出。