世界盃轉眼就過咗一個月，英超亦已密鑼緊鼓展開新球季。列強今期備戰有咩大動作？邊隊開季最難搞？今次就同大家介紹番。

阿仙奴一搔廿二年之癢，重奪英超冠軍，今季再以3400萬鎊引入希臘左翼索利斯（Christos Tzolis），正好填補杜沙特離隊後左側內切與及創造力上嘅空缺，但上季一眾主力爭標超出負荷加上世界盃嘅負擔已預計會帶嚟反噬，例如中堅沙列巴死頂踢世界盃導致傷患惡化需要長唞，中場迪勤懷斯（Declan Rice）、奧迪哥特（Martin Odegaard）經歷密集賽季與及世界盃估計會出現疲態，加上洛加特都已經離隊，阿仙奴重鎚出擊從紐卡素購入防中古馬雷斯呢一個舉動就顯得唔難理解。阿仙奴首週對手係已闊別英超25年嘅高雲地利，呢支經歷長期動蕩同財困嘅球隊前一季由車路士名宿林伯特執教至今，唔計原有借將買斷之外較矚目嘅收購就只有從降班嘅般尼手中接過右翼查奧拿（Loum Tchaouna）同埋喺法蘭克福購入瑞士中堅阿蘭達（Aurele Amenda），估計季初仍需要時間摸索同適應。
（22/08/2026 03:00 阿仙奴 vs 高雲地利）

曼城上季苦追阿仙奴功虧一簣，名帥哥迪奧拿亦順勢告退，衣砵由昔日嘅徒弟馬利斯卡接手，今期卻遇上西班牙中場洛迪喺世界盃交出世界級表現後再度傷出，中期而言曼城中場傳送、反搶與及防線前面屏障都會受到考驗，馬利斯卡喺延續哥迪奧拿風格之餘，曼城喺控球、壓迫與前場人手點樣重整呢幾方面都預期會係俾大家用放大鏡睇到實，但第一週面對首次亮相歐霸盃嘅般尼茅夫所受考驗未必會好大：般尼茅夫自己都迎嚟翻天覆地嘅變化，當由伊拉奧拿時代轉入馬高路斯嘅高能量足球，球會大舉購入中堅安東尼奧施華（Antonio Silva）、中鋒艾華路洛迪古斯（Álvaro Rodríguez）、右閘桑盧山齊士（Juanlu Sanchez）去填補辛尼斯達拿、馬高斯辛尼斯等離隊主將嘅空缺，加上法國中鋒新秀高洛比又因傷缺陣三至四個月，陣容變化之大估計唔係一時三刻會見得到真正實力。
（23/08/2026 21:00 曼城 vs 般尼茅夫）

般尼茅夫上季季初同樣面對大量主力流失，當時教練伊拉奧拿幾經艱辛將球會帶回正軌，如今伊拉奧拿已轉投利物浦，處理上季教練史諾缺乏激情同衝勁嘅打法所遺留落嚟嘅問題。此外「紅軍」上季天價買入伊薩（Alexander Isak）、穫斯（Florian Wirtz）、伊基迪基（Hugo Ekitike）幾位進攻球員未有即時回報，今季伊拉奧拿亦有一個任務就係搵到協調方法踢番出佢哋幾位嘅身價。利物浦上季陣容大變，首場對手紐卡素則係今季大執嗰一隊。上季幾乎帥位不保嘅賀維終於求去，有紅牛背景嘅38歲德國教練查斯素從吉達艾阿里過檔接手，而佢僅有嘅歐洲執教經驗就只有薩爾斯堡，一到埗就要先面對中場東拿利與及古馬雷斯先後出走所帶嚟嘅缺口，稍有不慎隨時又會重演去季熱刺驚心動魄嘅劇本。
（23/08/2026 23:30 紐卡素 vs 利物浦）

曼聯名宿卡域克上季幫曼聯站穩番個陣腳，今季會係首次帶隊踢晒整個球季，首週作客升班馬侯城未必會受到考驗，但接落嚟條防線將會需要多加留意，事關利辛度馬天尼斯（Lisandro Martinez）代表阿根廷踢到入世界盃決賽消耗唔細，另一中堅迪歷特（Matthijs de Ligt）又做咗手術，未有入選世界盃體力保留較多嘅麥佳亞（Harry Maguire）需要打醒十二分精神，而喺阿士東維拉買入嘅泰利文斯（Youri Tielemans）預計將會係中場一個幾好嘅補充。
（22/08/2026 19:30 侯城 vs 曼聯）

講到阿士東維拉，呢支應屆歐霸冠軍面臨「拆骨」嘅巨大挑戰，中場走咗嘅唔只係泰利文斯，就連攻中摩根羅渣士都已轉投車路士，再加上阿馬度奧拿拿出戰世界盃十字韌帶重傷，等於同時削弱晒前場推進、節奏控制與中場攔截三大功能，首週對手白禮頓就算已流失咗前鋒韋碧克與及中堅雲赫基兩大主力，估計都已足夠俾到唔少壓力俾維拉。（傳聞維拉正係同紐卡素拗緊手瓜，爭奪拜仁慕尼黑防中祖奧柏連拿救亡）
（23/08/2026 21:00 白禮頓 vs 阿士東維拉）

摩根羅渣士「上車」可以話係英超今期最矚目嘅其中一宗轉會，再加上重金從阿特蘭大購入上季意甲最佳後衛柏利斯達（Marco Palestra），呢支冇得打歐洲賽嘅「車仔」可以全力英超足以引發無限聯想，但事實上今季爭啲因為早年財務違規而扣分兼唔俾買人嘅車路士已經要好努力做靚盤數，喺維持高價收購嘅同時佢哋亦已經放走咗古古列拿、查洛巴等嘅中後場要員，新帥沙比阿朗素想洗脫上季喺皇家馬德里嘅不愉快經歷，喺得到高層同意之下有較大自主度嘅沙比亦都免轉會費引入咗佐敦軒達臣呢類有豐富經驗嘅老將，但大家都知車路士班高層幾有性格，沙比阿朗素帶領呢支陣容大改嘅隊伍只要稍有差池，班高層話唔定又會故態復萌。車仔首週尾場面對有意年輕化嘅富咸，佢哋剛剛就接收咗皇馬進攻雙子星干沙路加西亞（Gonzalo Garcia）與及施薩柏拉斯奧斯（Cesar Palacios），更以破北愛爾蘭球員轉會紀錄嘅3000萬鎊從修咸頓買入中場查理斯（Shea Charles），新教練艾比路亞上季咁啱就係接替沙比阿朗素出任皇馬看守教練，首週兩位教練相逢自當百般滋味在心頭。
（25/08/2026 03:00 富咸 vs 車路士）