19/09/2026 03:00 賓福特(英超7) vs 車路士(英超6)

賓福特週中聯賽淘汰雷丁，攻中Carvalho十字韌帶傷咗近一年復出I隊首次建功，球隊亦通過大幅度輪換保留到實力。本週只要踢一場嘅車路士輸俾阿仙奴後再喺主場意外失分俾侯城，防守仍有待鞏固，加上賓福特近四次聯賽主場對車路士都賽和，今場野心唔會細。

19/09/2026 19:30 熱刺(英超17) vs 阿士東維拉(英超19)

熱刺今季英超開季四場仍未識入波，喺聯賽盃第三圈精銳盡出仍然不敵利物浦出局，入球效率低嘅問題仍有待解決。客隊維拉上週先至攻入聯賽首球但排名比熱刺更低，聯賽盃客勝高雲地利贏番些少自信，新買嘅攻中Manzambi喺呢兩場已可以後備上陣，但畢竟維拉中場傷停幅度仍係唔細，Manzambi就算全面復出恐怕都只係杯水車薪。

19/09/2026 22:00 白禮頓(英超5) vs 阿仙奴(英超1)
阿仙奴開季四戰全勝入八球僅失一球，球會及時購入Konsa配合埋Calafiori、White等原有守將總算cover到Mosquera以至Saliba等人嘅新傷舊患。白禮頓雖然週中聯賽盃由後備建功3:2反勝曼聯，但本身傷兵仍係多，主場迎戰兵工廠都應係弱勢嘅一方。

19/09/2026 22:00 愛華頓(英超9) vs 葉士域治(英超10) 

愛華頓聯賽盃第三圈1:0僅勝英冠狼隊，領隊Moyes保留框架之下稍作輪換，直至比賽末段先至入波奠勝，顯示攻力仍然不足，場外又有傳媒傳出金主TFG有意引入新投資者，愛華頓賣盤嘅猜測亦有可能影響軍心。葉士域治聯賽盃大幅度輪換一如所料不敵阿仙奴，睇嚟早已將注意力留咗俾今場聯賽。

19/09/2026 22:00 紐卡素(英超12) vs 侯城(英超4)

紐卡素上輪聯賽作客1:4慘敗俾列斯聯，前中後主力皆有傷兵之下，年輕陣容喺對抗同基本執行等方面都間中有失誤，隊波表現飄忽暫時較難根治。侯城則喺上週作客史丹福橋2:2賽和車路士，延續不敗走勢之餘，亦keep到防守穩陣、反擊效率高嘅風格，隨時會俾到主隊麻煩。

20/09/2026 00:30 諾定咸森林(英超11) vs 高雲地利(英超20)

踏入廿一世紀以來兩隊交手已有廿次，但今次先至係佢哋嘅首場英超對碰。高雲地利今季六場正賽輸五場失到15 球，聯賽四戰全敗未入過波，週中喺聯賽盃又不敵維拉，底子有限之下要七日內踢三場體力同士氣都受考驗，加上今場失去前鋒Awoniyi（停賽）之餘後衛Amenda亦帶傷大有機會缺陣，大崩盤嘅風險不能忽視。

20/09/2026 21:00 般尼茅夫(英超15) vs 利物浦(英超8)

Iraola首次以利物浦主帥身份重返Vitality Stadium，面對自己一手帶入歐洲賽嘅般尼茅夫，對主隊戰術及球員特點應會非常熟悉。主隊週四首次出戰歐霸，精銳盡出作客贏皇家蘇斯達，但佢哋下半場長時間受壓，體能消耗唔細。而利物浦週中聯賽盃則喺少量輪換之下輕取熱刺，期間見到中堅Gomez復出踢咗半場。

20/09/2026 21:00 列斯聯(英超3) vs 水晶宮(英超16)

列斯聯中鋒Calvert-Lewin開季以嚟表現搶鏡，擔當球隊進攻樞紐之餘自己亦已喺六場正賽取得四個入球。聯賽開季表現低迷嘅客隊水晶宮原班人馬出戰歐霸，星期四主場輕取列治普斯納，早早領先後已識得控制節奏減少損耗，期間亦喜見翼鋒I.Sarr傷癒復出有得落場，但主力門將Henderson估計點都要休養埋個國際賽檔期。

20/09/2026 21:00 曼城(英超2) vs 新特蘭(英超14) 

曼城勝出曼市打比之後喺週中進行大幅輪換，喺聯賽盃大勝諾域治，晉級之餘又俾到一班小將實戰機會，亦減輕咗八日三戰帶嚟嘅負荷，餘下主要挑戰則「只係」在於繼左翼Doku長傷之後再遇上右翼Foden停賽。新特蘭五十幾年嚟首次重返歐洲賽場，主場出盡力贏阿爾克馬爾唔算意外。但呢場歐霸賽事剛好處於兩場英超硬仗之間，上週主場不敵阿仙奴左閘Mandava更係領紅需要停賽，緊接又要作客曼城對新特蘭構成一定壓力。

20/09/2026 23:30 富咸(英超18) vs 曼聯(英超13)

曼聯聯賽盃第三圈中前場只係稍作輪換，主場即俾白禮頓反勝，副選防線協調性稍差，但主力中堅Shaw康復進度不明兼夾傳出準備完季走人，主場輸咗曼市打比帶嚟嘅失落有待舒緩。聯賽開季四場僅得一分嘅富咸則喺聯賽盃作客勝英冠韋斯咸，新任主帥Arbeloa對球員防守表現仍然不滿。