英超第3週精選賽前分析(05-06/09/2026)
足球資訊 | 英格蘭超級足球聯賽(2026/27) | 發布日期: 03/09/2026
直播資訊: Now TV
05/09/2026 03:00 葉士域治(英超12) vs 利物浦(英超13)
葉士域治爆冷贏完曼聯即輸番俾新德蘭，夏窗關閉前冇再增兵，靠晒當初買入嘅Enciso（兩場都有助攻）與及Fatawu（兩場共曾創造三次入機機會）。利物浦則係兩戰皆和之餘更係跨季連續八場有失波，防守係新帥 Iraola 上任後最大嘅隱憂，但球會心思仍然放喺前線，喺疑似準備Gakpo離隊嘅前提下花咗過億鎊簽入巴黎翼鋒Barcola，但最終Gakpo冇走人，利記現時儲落一大批左翼之下就睇嚟緊安排Doue定Gakpo踢番自己最常踢嘅左路。
05/09/2026 19:30 紐卡素(英超6) vs 般尼茅夫(英超14)
紐卡素開季兩場一勝一和Elanga搭Wissa嘅前線組合面對利物浦以及熱刺都發揮到凌厲火力，幫到新帥Jaissle站穩陣腳，但球會再多行一步，喺轉會deadline前再喺里爾買入中鋒Fernandez-Pardo同時將上季收購嘅Woltemade外借出去。般尼茅夫開季則係一和一負，防守未算穩健，新從祖雲達斯借用嘅門將Di Gregorio上一場仍只係座上客。
05/09/2026 22:00 賓福特(英超5) vs 新特蘭(英超11)
上季兩隊交鋒各喺主場勝出。今場嘅主隊賓福特先贏尚未企穩嘅熱刺然後只能戰平有一定防守能力嘅列斯聯， Sangaré同Janelt嘅中場組合算係穩定。新特蘭首週意外輸俾葉士域治又係靠主場發威贏番富咸，今季多咗條歐霸戰線嘅佢哋鍊贏水晶宮奪得里昂左翼Malick Fofana，再問熱刺借用奧地利國腳中鋒。
05/09/2026 22:00 白禮頓(英超9) vs 列斯聯(英超8)
白禮頓開季兩場一勝一負得失球合計7:4，進攻暫時唔太擔心但後防就仍需努力。列斯聯暫時所見則係防守紀律好但進攻創造力僅屬一般，打後亦只係從法蘭克福借用到法國U21翼鋒Bahoya。
05/09/2026 22:00 富咸(英超16) vs 水晶宮(英超18)
兩隊都係開季首兩場輸晒，其中水晶宮有盡最後努力充實陣容，分別簽入中場Q.Timber、曾借用過嘅左閘Chilwell，又借用阿特蘭大中堅Ahanor，而富咸嘅增強力度則明顯較細。
05/09/2026 22:00 曼城(英超1) vs 高雲地利(英超17)
贏晒頭兩場嘅曼城喺deadline前簽下愛華頓嘅右翼 Ndiaye之餘，更再掏出1.25億鎊接收埋車路士想卸載好耐嘅中場E.Fernandez，連同原有嘅Cherki以及較早前加盟嘅Bouaddi，曼城中場將進入全新時代。連輸兩場嘅升班馬高雲地利引援力度自然差天共地，更大問題係原有主力之中前鋒Wright、中場Onyeka、中堅Thomas已經有傷，陣容深度大受影響。
05/09/2026 22:00 諾定咸森林(英超15) vs 熱刺(英超20)
熱刺瘋狂買人嘅「救亡」行動尚未見效，球隊就先輸晒開季兩場、共失五球而一球未進，教練De Zerbi最新收到嘅「禮物」則係已經停賽近兩年嘅昔日愛將。對於同期只得一分嘅森林而言，照計應趁喺主場盡全力搏開齋。
06/09/2026 00:30 侯城(英超3) vs 阿士東維拉(英超19)
侯城先爆冷贏曼聯賽程又即安排實力明顯較弱嘅另一升班馬高雲地利，唔覺唔覺拎盡六分坐咗上第三位，今場面對稍為喘定嘅維拉應可更深入睇清呢隊波係咩料子。維拉上週陣容天殘地缺僅以一球見負阿仙奴，雖然繼續捧蛋但已見到一絲希望，隨後球會亦簽到PSG嘅塞內加爾國腳翼鋒Mbaye與及本地中堅Harwood-Bellis，應可幫到Emery穩住球隊表現同軍心（維拉中場João Gomes紅牌停賽）。
06/09/2026 21:00 愛華頓(英超7) vs 曼聯(英超10)
愛華頓一系列轉會操作失誤，先後有摩納哥前鋒Balogun甩底唔嚟、但同時已放走咗兩個前鋒I.Ndiaye同埋Beto，整體實力比轉會窗開啟前反而更弱，中期而言都幾令人擔心。曼聯則喺大意輸侯城之後對住葉士域治亦要係失球在先，Carrick坐正以嚟嘅防守漏洞仍頗為明顯。
06/09/2026 23:30 阿仙奴(英超2) vs 車路士(英超4)