29/08/2026 03:00 水晶宮(英超16) vs 曼城(英超17) 

曼城上輪由新帥Maresca排出怪陣僅勝般尼茅夫，如今摩洛哥人氣中場Bouaddi已經加盟，上場提早離場嘅另一新到中場Anderson亦已合係無大礙，人腳調節後應能以更完整嘅陣容出擊。同樣換咗教練嘅水晶宮上星期則係作客不敵愛華頓，中堅Riad重創疑似全季報銷加上前鋒I.Sarr、Mateta去留未定都令部署更加捉襟見肘。

29/08/2026 19:30 利物浦(英超10) vs 諾定咸森林(英超15)

諾定咸森林有新帥Glasner接手但聯賽首戰主場0:1不敵列斯聯，防線穩陣但進攻效率偏低，嚟緊就算真係羅致到前鋒Delap補充火力，攻中Gibbs-White仍然有傷在身，此外中場Anderson走人嘅影響亦不容忽視。利物浦喺邊鋒、中場等位置嘅補完方向未夠明確，新帥Iraola上週帶隊作客亦只能靠一鼓作氣追平紐卡素，暫時睇嚟對防線嘅掩護仍係未夠之餘更傳出門將Alisson又將要面對長期傷患。

29/08/2026 22:00 般尼茅夫(英超13) vs 愛華頓(英超4)

失去中興教練Iraola嘅般尼茅夫改由Rose接掌，首仗作客曼城僅負1:2算係過關，只係中鋒Kroupi仍在養傷就較為頭痕。球員流失影響相對較細嘅愛華頓大致上保留到原有框架展開新球季，上場中前場有Dewsbury-Hall、Barry繼續合作得分，防中Garner亦已重返賽場。

29/08/2026 22:00 高雲地利(英超18) vs 侯城(英超5) 

本應只係一場較為平淡嘅升班馬開季互片，卻因為侯城開季即贏曼聯而令大家多咗幾分好奇。侯城嘅教練Jakirovic本身就係Klopp高位壓逼打法嘅信徒，喺將士用命之下令到曼聯難以組織，表現令人眼前一亮。同樣係首仗「打大佬」，由Lampard帶領嘅高雲地利則未有俾到驚喜淨輸三球俾阿仙奴，估計短期內仍需要適應英超速度同節奏。

30/08/2026 00:30 熱刺(英超19) vs 紐卡素(英超11)

執番身彩唔洗降班嘅熱刺大舉買人，暫時所見仍係有待磨合，上週作客慘負賓福特0:3，全靠週中聯賽盃大勝查爾頓俾番大家些少信心，兩個中堅Van de Ven、Danso互撼應無大礙，教練De Zerbi亦都有讚新從曼城轉投嘅前鋒Savinho，但另一重磅收購Tonali幾時復出就未有聲氣。客隊紐卡素放緊暑假先話換帥，歐洲執教經驗唔多嘅Jaissle首場即俾利物浦追平，短期內仍需要面對主將翼鋒Gordon離去（新援Touré上週未登場）帶嚟嘅缺口。

30/08/2026 21:00 車路士(英超6) vs 白禮頓(英超1)

白禮頓首戰4:0大破維拉一過榜首癮，及後防中Baleba已經轉投曼聯，中場調度短期內會否出亂子值得留意。車路士新教頭Alonso擺番嚟利華古遜年代成名嘅3-4-2-1陣式初嚐甜頭贏咗富咸，前面安頓好新加盟嘅Rogers之餘更令有啲離心嘅Palmer重拾希望，接落嚟就要睇受盡柴台嘅阿根廷中場E.Fernandez想點樣處置。

30/08/2026 21:00 列斯聯(英超9) vs 賓福特(英超3)

事有湊巧，列斯聯接連喺英超開鑼同聯賽盃雙殺森林，聯賽盃有選擇性做輪換之餘，亦見到從慕遜加柏轉嚟嘅瑞士國腳中堅Elvedi已經投入服務。賓福特趁熱刺未熱輕鬆射入三球，承接季前友賽7:0大破法蘭克福與及之後聯賽盃6:1盡炒伯明翰嘅強大火力，但不得不提雙方之前已喺英超對賽連和咗三場。

30/08/2026 21:00 新特蘭(英超14) vs 富咸(英超12)

升班馬一躍成為歐霸份子嘅新特蘭，首週作客葉士域即告輸波，返到主場光明球場勢必主動搶分掙回面子。銳意年輕化嘅富咸首仗不敵車路士，上季擔當皇馬看守教練嘅Arbeloa初到英超睇嚟火候未夠，今場就睇復出嘅中堅J.Andersen能否幫上一把。

30/08/2026 23:30 曼聯(英超17) vs 葉士域治(英超7)

曼聯中堅de Ligt開完刀仍有待復出，開咧即已經輸俾升班馬侯城俾咗曼迷一個超大surprise。及後曼聯已經確認從白禮頓羅致到防中Baleba，嚟緊就要睇吓佢點樣同另外兩個同係新到埗嘅Tielemans與及A.Santos爭位。曼聯今場即刻要對另一隊升班馬亦有暗湧：葉士域治開波即贏咗新特蘭，一班新加盟而略有名氣嘅中前場球員（例如Enciso、Fatawu、前田大然）睇嚟係有能力繼續興風作浪。

01/09/2026 03:00 阿士東維拉(英超20) vs 阿仙奴(英超2)

貴為歐霸冠軍嘅維拉慘遭拆骨，從歐霸決賽對手手中撬嚟嘅攻中Manzambi仍受到世界盃傷患後遺影響，短期內都難以彌補Rogers離隊嘅缺口（另一中場Tielemans走人亦屬災難級別）。維拉喺夏窗關閉前仍有好多個炸彈要拆：搶到門將鈴木彩艶但要安排E.Martinez嘅出路、另一功臣Watkins勢往中東掘金但傳出替補「只係」車路士嘅N.Jackson時大家又覺得唔夠班。維拉今週即要面對同市宿敵兼開局唔錯嘅衛冕冠軍阿仙奴，「阿記」中堅Konsa好大機會首日開工即要作客倒戈。