英超開季只係踢咗五週，一進入國際賽檔期放長假，就爆出曼城俾英超賽會判定早年115項財務違規嘅指控全部成立。呢單嘢由2018年內部文件外洩起計到依家宣判，維期已有八年咁長，亦已經由球圈新聞升級成為國際頭條，估計仍有一大堆行外人未能預知會出現嘅程序會陸續浮現，唔會咁快有定案，但擺在眼前就係國際賽超長檔期之後曼城即刻要作客利物浦，所有目光都會集中喺曼城上下點樣面對呢場比賽，主場出戰嘅利物浦球員反而變成咗配角。

批指控簡單嚟講就係：英超方面認定曼城喺2009至2018年間多個賽季內透過被視為虛構或不實嘅商業安排，同時間進行「誇大收入」與及「隱藏實際成本」嚟整靚盤數去通過審查，涉及金額超過9億英鎊，規模之大完全係超越我哋呢啲平民百姓嘅想像。

一直以嚟曼城都被指未有充分配合英超嘅調查工作，而又當牽涉史無前例咁大筆數，判罰力度已經冇可能同較早前主動投案嘅車路士相提並論。問題更為複雜之處在於：曼城主席Khaldoon Al Mubarak同時係阿聯酋政府高級官員，球會背後嘅阿布扎比資本與英國、阿聯酋之間廣泛嘅投資與政治關係，而佢哋亦都好唔客氣聲言一旦重罰將會影響埋國與國之間嘅關係，與及佢哋喺英國當地嘅投資。最終曼城係扣分、罰錢、禁買人，甚至係降班之中會中幾多樣，喺現階段去評估都係言之過早。但有一樣嘢唔會錯嘅係：曼城球員嘅賽前情緒已經受到好大程度嘅影響。

英格蘭主帥杜曹喺國際賽期間就有提到，曼城呢單案件已係隊內嘅一大話題，嚟自曼城嘅球員當然係會收到大量八卦或者慰問嘅message同埋來電，但本質上佢哋都只係「打工仔」，未必掌握到會方嘅全面資訊，感到焦慮或者擔心都係人之常情。而當國際賽檔期過去，曼城球員重新集合前往晏菲路，就都一定要預咗全場利迷會「加料歡迎」佢哋到訪：事關曼城涉嫌違規嘅期間以至及後未有證據涉案嘅收成期，利物浦同曼聯、阿仙奴都可以話係「直接受害者」。高普執教利物浦嘅年代之中就有多次同曼城要鬥到最後，尤其係 2018/19與及2021/22兩季，利物浦同樣積分超過90但都未足以奪冠，同樣係僅差一分屈居於曼城之下。所以唔怕誇張講句：呢場波曼城教練馬利斯卡點樣為球員預先做定心理輔導，分分鐘緊要過同佢哋brief戰術。

今場「利曼大戰」俾曼城搶晒fo，但當然我哋都要留意番主隊呢邊又係唔係已經準備好呢場大戰：利物浦開季至今五場波兩勝三和叫做不敗，但與此同時五支對手排名都係靠後（首週對手紐卡素現時排第九），今場對曼城先至係開季第一場大戰，而「紅軍」其中一個再被人提及嘅未解決問題就係德國攻中穫斯（Florian Wirtz）嘅企位以至狀態表現嘅互動關係。穫斯上季天價加盟利物浦，俾時任教練史諾安排踢過中前場多個位置，整體數據表現只能講係不過不失。嚟到今季，新帥伊拉奧拿明確表示想將穫斯固定喺攻中「10號位」，但穫斯開季至今六場正賽就只係錄得一個助攻，唔少利迷都會覺得穫斯咁樣坐硬10號位，只會係犧牲咗另一重要中場球員蘇保斯拿爾（Dominik Szoboszlai）嘅進攻能力。有趣嘅係，穫斯喺國際賽期間跟番教過利物浦嘅高普為德國展開重建工作，而現已成為德國隊教練嘅高普係將穫斯放番喺佢喺利華古遜年代成名嘅邊路以至half-space活動，結果不論係德國隊嘅進攻流暢度與及穫斯嘅個人威脅都有所提升。
雖然穫斯自己較鍾意踢10號位，但實際上嘅表現落差確係不容忽視。當高普都有講話穫斯最適合喺中路偏兩側嘅區域自由走動、而唔係死守喺10號位，而伊拉奧拿如果仍然想測試落去，當對手收窄防守空間或者利物浦主力控球嗰陣，穫斯最終會唔會又係陷入觸球次數多但致命一傳少嘅局面？又如果伊拉奧拿喺翼鋒加普受傷之後決定試下俾穫斯打邊，又會唔會開拓出新嘅局面呢？

又試下從客隊角度睇：曼城頭五場聯賽對手排名亦唔係高（最高已係排11嘅曼聯）但係五場全勝，今場暫時肯定未能上陣嘅要員計落就只有翼鋒科頓。曼城球員喺抵抗客場超大壓力得嚟，又如果把握到伊拉奧拿呢個實驗品嘅不確定性，又會否力保不失全身而退呢？我哋喺估主場球迷會掛咩banner、唱咩歌嘲笑客隊之餘，兩隊喺國際賽過後點樣調節同適應先至係更值得留意嘅地方。